இந்திய கிரிக்கெட் வரலாற்றில் மறக்க முடியாத ஒரு கசப்பான அத்தியாயம், 2008 ஆம் ஆண்டு ஐபிஎல் தொடரில் மும்பை இந்தியன்ஸ் மற்றும் கிங்ஸ் லெவன் பஞ்சாப் அணிகளுக்கு இடையிலான போட்டிக்குப் பிறகு நடந்த ஹர்பஜன் சிங் – ஸ்ரீசாந்த் மோதல். இந்தச் சம்பவம் அன்று பெரும் பரபரப்பை ஏற்படுத்தியதோடு, ஹர்பஜன் சிங்கின் கிரிக்கெட் வாழ்க்கையிலும் ஒரு கறையாகப் பதிந்தது. பல ஆண்டுகளுக்குப் பிறகு, ஹர்பஜன் சிங் தனது மனதை வருத்திய இந்தச் சம்பவம் குறித்து மீண்டும் மனம் திறந்துள்ளார். குறிப்பாக, ஸ்ரீசாந்தின் மகனிடம் இருந்து வந்த ஒரு கேள்வி, அவரது மனதை எந்த அளவுக்கு நொறுக்கியது என்பதை உணர்வுபூர்வமாக வெளிப்படுத்தியுள்ளார்.
“அந்தச் சம்பவம் நடக்காமல் இருந்திருக்க வேண்டும்”
இது குறித்து அவர் கூறுகையில், எனது கிரிக்கெட் வாழ்க்கையில் ஒரு சம்பவத்தை அழித்துவிட வேண்டும் என்றால், அது ஸ்ரீசாந்துடன் நடந்த சண்டைதான். அது தவறு. அதை நான் செய்யக்கூடாது. அதை மறந்துவிடவேண்டும் என்பதே என் எண்ணம். நான் 200 முறை மன்னிப்புக் கேட்டுவிட்டேன். அதை நான் வருத்தப்படாமல் நினைக்க முடியாது. அவர் (ஸ்ரீசாந்த்) என் சக வீரர். நண்பர். ஆனால் அவ்வளவு கோபம் வந்தது ஏன் என்று எனக்கே புரியவில்லை. அந்த வாக்குவாதம் அதுமட்டுமே ஆகி இருந்திருக்கலாம். ஆனால், நான் என் வரம்பு மீறினேன். நான் அவரை அடித்தது எனது மிகப்பெரிய தவறு. அது என் வாழ்க்கையின் கருப்புப் பக்கம்தான். என்று கூறியிருந்தார்
மனதை நொறுக்கிய ஒரு கேள்வி
இந்தச் சம்பவம் நடந்து பல ஆண்டுகளுக்குப் பிறகு, ஹர்பஜன் சிங் தனது மனதை மிகவும் வேதனைக்குள்ளாக்கிய ஒரு நிகழ்வைப் பற்றிப் பேசினார். ஸ்ரீசாந்தின் மகனுடன் அவர் பேசிக்கொண்டிருந்தபோது, அந்தச் சிறுமி, “நான் உங்களுடன் பேச விரும்பவில்லை. நீங்கள்தான் என் அப்பாவை அடித்தீர்கள்,” என்று கூறியிருக்கிறார். இந்த வார்த்தைகள் ஹர்பஜனின் மனதை நொறுக்கியதாக அவர் தெரிவித்துள்ளார். “கண்ணீரை அடக்க முடியாத நிலைக்குச் சென்றேன்,” என்று தனது உணர்ச்சிபூர்வமான நிலையையும் விவரித்துள்ளார்.
ஒரு தவறு செய்து, அதற்காகப் பலமுறை மன்னிப்புக் கேட்டும், அந்தத் தவறு அடுத்த தலைமுறைக்கும் கடத்தப்பட்டு, ஒரு சிறு குழந்தையின் வாயிலாகத் தனக்குத் திரும்ப வந்தபோது, ஹர்பஜன் அடைந்த மனவேதனை அளப்பரியது. இது, அவர் செய்த செயலின் நீண்டகாலத் தாக்கத்தையும், அது ஒரு தனிப்பட்ட மோதலாக நின்றுவிடாமல், சம்பந்தப்பட்டவர்களின் குடும்பங்களிலும் ஒரு பாதிப்பை ஏற்படுத்தியதையும் காட்டுகிறது.
கற்றுக் கொண்ட பாடம் மற்றும் மனித உணர்வுகள்
மேலும் அவர் கூறுகையில் நான் மனிதன், தவறு செய்தேன். அதை ஒப்புக்கொள்கிறேன். என் பிள்ளைகள் கூட இந்த சம்பவம் பற்றி கேட்கும்போது எனக்கு எளிதாக பதிலளிக்க முடியவில்லை. இன்று நான் 43 வயதானவன். 26 வயதில் செய்த ஒரு தவறு இன்னும் என் மீது ஒரு சுமையாக இருக்கிறது என்றும் அவர் கூறியிருந்தார்.
ஹர்பஜன் சிங் – ஸ்ரீசாந்த் மோதல், கிரிக்கெட் வீரர்களின் மன அழுத்தத்தையும், போட்டி மனப்பான்மையின் தீவிரத்தையும் பிரதிபலிக்கிறது. சர்வதேச அரங்கில் விளையாடும் வீரர்கள், வெற்றி பெற வேண்டும் என்ற தீவிர தாகத்தில் சில சமயங்களில் தங்களது உணர்ச்சிகளைக் கட்டுப்படுத்தத் தவறிவிடுகிறார்கள். ஆனால், இந்தச் சம்பவத்தின் மூலம் வெளிப்படும் ஹர்பஜனின் நேர்மையான வருத்தம், மனித தவறுகள் மற்றும் அவற்றின் விளைவுகள் பற்றிய ஒரு ஆழமான பார்வையை வழங்குகிறது.
