கிரிக்கெட்டின் கடவுள் என்ற பட்டபெயரில் இந்தியா மட்டுமல்லாது இந்த உலகமே கண்டெடுத்த மிகச் சிறந்த பேட்மேன்களில் முதன்மையானவராக போற்றப்படுபவர் சச்சின் டெண்டுல்கர். இவர் தனது 16 வயதில் சர்வதேச கிரிக்கெட்டில் அறிமுகமாகி பின்னர் சிறப்பாக செயல்பட்டு இம்ரான் கான், வாசிம் அக்ரம், மெக்ராத், ஷேன் வார்னர், முத்தையா முரளிதரன் போன்ற உலகின் முதன்மையான பந்துவீச்சாளர்களை எதிர்கொண்ட அவர் 30000க்கும் மேற்பட்ட ரன்களையும் 100 சதங்களையும் அடித்துள்ளார்.
மேலும் ஒருநாள் கிரிக்கெட்டில் சாதனையாக பார்க்கப்பட இரட்டை சதத்தை முதல் முறையாக அடித்தது உட்பட பல வரலாற்று சாதனைகளை படைத்துள்ள அவர் பல கோடி ரசிகர்களுக்கும் இளம் வீரர்களுக்கும் ரோல் மாடலாக திகழ்கிறார். அப்படி அவரை ரோல் மாடலாக கொண்டு கிரிக்கெட்டின் மீதான காதலால் ரயில்வே டிக்கெட் கலெக்டர் வேலையை விட்டு உள்ளூர் போட்டிகளில் அதிரடியாக விளையாடி கங்குலி தலைமையில் அறிமுகமான எம்எஸ் தோனியும் இவரை போலவே பல சாதனைகளையும் படைத்துள்ளார்.
அதுமட்டுமல்லாமல் 3 விதமான ஐசிசி வெள்ளைப்பந்து உலகக் கோப்பைகளை வென்ற ஒரே கேப்டன் என்ற சரித்திரம் படைத்த அவர் மிகச்சிறந்த விக்கெட் கீப்பர் பேட்ஸ்மேனாகவும், மிடில் ஆர்டர் பேட்மேனாகவும், ஃபினிஷராகவும் செயல்பட்டு பல இளம் வீரர்கள் மற்றும் ரசிகர்களுக்கு ரோல் மாடலாக திகழ்கிறார். இந்நிலையில் சச்சின் டெண்டுல்கர் மற்றும் தோனி ஆகிய இருவருமே ஒரே மாதிரியான மதிப்பையும் மரியாதையையும் ஒளியையும் கொண்டுள்ளதாக இந்திய வீரர் மோகித் சர்மா ஒரு ரசிகனாக வியப்புடன் பாராட்டியுள்ளார்.
மோஹித் சர்மா சமீபத்தில் கொடுத்த பேட்டி ஒன்றில் கூறுகையில் “கிரிக்கெட்டில் தோனி பாய் செய்துள்ள சாதனைகள் மற்றும் ஒளி கிட்டத்தட்ட சச்சின் பாஜியை போலவே இருக்கிறது. குறிப்பாக சச்சினை நாங்கள் ஒருமுறையாவது பார்த்து விட வேண்டும் என்ற எண்ணம் தோனி மீதும் ஏற்படுகிறது. குறிப்பாக தற்போதைய இளம் தலைமுறைக்கு மஹி பாய் சச்சினுக்கு நிகரான உத்வேகத்தை கொடுப்பவராக இருக்கிறார்”
“அதற்கு சான்றாக போட்டிகள் முடிந்த பின் இளம் வீரர்கள் எதைப் பற்றியாவது அவரிடம் எப்படியாவது பேசி விட வேண்டும் என்று நினைப்பதை பாருங்கள். அந்த வகையில் எங்கே சென்றாலும் மஹி பாய் தனக்கென்று ஒரு ஒளியை எடுத்துச் செல்கிறார். குறிப்பாக நீங்கள் அதிகமாக பேசவில்லை என்றாலும் கூட அவரை சுற்றி அருகில் இருந்தாலே ஒரு நல்ல உணர்வு ஏற்படும். மேலும் நீங்கள் கேட்பதற்கு நிதர்சனமாக அவர் கொடுக்கும் விளக்கங்களை அனைத்து நேரங்களிலும் கேட்டுக் கொண்டே இருக்கலாம் என்பதை போன்ற உணர்வு தோன்றும்” என்று கூறினார்.
